१० चैत,काठमाडौं । नेकपा एमालेका महासचिव शंकर पोखरेलले प्रेस चौतारी नेपालको नेतृत्व सर्वसम्मतिबाट चयन गर्न निर्देशन दिएका छन्। प्रेस चौतारीको १०औँ राष्ट्रिय महाधिवेशनको उद्घाटन समारोहलाई सम्बोधन गर्दै महासचिव पोखरेलले एकताको माध्यमबाट नेतृत्व चयन गर्न आग्रह गरेका हुन्।
उनले संगठनलाई सानो, चुस्त र प्रभावकारी बनाउनुपर्नेमा जोड दिँदै हिजो विभाजनको पीडा भोगेकाहरू पनि फर्किएकाले उनीहरूको उचित व्यवस्थापन गर्नुपर्ने बताए। महासचिव पोखरेलले प्रतिस्पर्धा र एकतालाई सही समयमा पहिचान गर्न नसके संगठनले प्रभावकारी रूपमा काम गर्न नसक्ने धारणा व्यक्त गरे।
महासचिव पोखरेलले भने, ‘गणेश बस्नेतजीले एकताबद्ध संगठन बनाउन नेतृत्व गरिरहनुभएको छ। उहाँलाई सहयोग गर्न पार्टीका नेताहरू पनि यहाँ उपस्थित हुनुहुन्छ। आवश्यक परेको खण्डमा भानुभक्त ढकाल र राजेन्द्र गौतम तपाईँहरूकै बीचमा रहनुहुनेछ। मलाई विश्वास छ, नेतृत्व चयनका लागि उहाँहरूलाई खोज्नुपर्ने अवस्था आउने छैन। त्यसैले सर्वसम्मत र एकताबद्ध रूपमा नेतृत्व चयन गर्नुहोला।’
उनले प्रेस चौतारीलाई एकताबद्ध, छरितो र चुनौतीहरूको सामना गर्न सक्ने संगठनको रूपमा विकास गर्न आग्रह गरे।
प्रतिक्रिया